[1]
Ընթերցողին է ներկայացվում «Դրօշակի» 2025 թվականի օգոստոսյան համարը։ Պաշտոնաթերթի այս համարի հոդվածների մեծ մասը նվիրված է Վաշինգտոնում ԱՄՆ-ի, Հայաստանի և Ադրբեջանի ղեկավարների բանակցությունների արդյունքներին և ընդունված փաստաթղթերին, որոնց առանցքում է, այսպես կոչված, Զանգեզուրի միջանցքի խնդիրը։ Ամերիկյան ուսումնասիրությունների հայկական կենտրոնը, այս առիթով «Դրօշակին» տրամադրած հոդվածում, անդրադառնում է հայության համար մի շարք կարևոր հանգամանքների, որոնք բխում են վաշինգտոնյան հանդիպումից, ինչպես և արտացոլված են շրջանառության մեջ դրված երկու փաստաթղթերից։
Մոսկվայի Սևծովյան-Կասպիական տարածաշրջանի ինստիտուտի առաջատար գիտաշխատող Սարգիս Սարգսյանը վերլուծում է հավանական միջանցքի խնդիրը աշխարհաքաղաքական համատեքստում՝ անդրադառնալով տարածաշրջանային գործընթացներին, որոնք էլ բխում են դերակատար երկրների շահերից։
Ինչպես վերևում ակնարկեցինք նույն թեմային անդրադարձ կա նաև «Դրօշակում» հրապարակված մյուս հոդվածներում, որոնց ասելիքը գլխավորապես Հայաստանի ներքին ու արտաքին քաղաքական և ոչ միայն քաղաքական խիստ տագնապալի իրողություններն են՝ հակազգային իշխանությունների արկածախնդրական գործունեությամբ պայմանավորված։ Մասնավորապես «Առաջնորդողում» խոսվում է այն մասին, որ երկիրը ներքաշելով ճակատագրական գործընթացների մեջ օրվա իշխանությունները, առաջնորդվելով սոսկ սեփական իշխանության վերարտադրության նպատակով, փորձում են պղտոր գործընթացներից, աճպարարի պես, դուրս բերել Խաղաղության հասնելու կեղծ պատկերը առաջիկա ընտրություններում հերթական անգամ ժողովրդին մոլորեցնելու համար։
Պատմաբան Անի Մելքոնյանը անդրադարձել է օգոստոս ամսին հայ ժողովրդի համար տեղի ունեցած պատմական կարևորության երկու իրադարձությունների՝ 1920 թ․օգոստոսի 10-ին Սևրի պայմանագրի ստորագրմանը և 1990 թ․օգոստոսի 23-ին ՀՀ խորհրդարանի կողմից Հայաստանի անկախության մասին հռչակագրի ընդունմանը։ Այս հոդվածի խորագիրը հուշում է, թե որն է հրապարակման ասելիքը՝ «Սևրի սինդրոմը կամ հայոց պահանջատիրության ուրացմանփաշինյանական քաղաքականությունը»։
«Դրօշակն» իր ընթերցողի ուշադրությանն է ներկայացնում քաղաքական և այլ բնույթի մի շարք այլ հոդվածներ, որոնք, կարծում ենք, կընթերցվեն հետաքրքրությամբ։
Ներբեռնել համարը [2]